طلبية الموز

اقرأ القصة

© جميع الحقوق محفوظة. يُحظر نسخ هذا المحتوى أو إعادة نشره أو توزيعه أو استغلاله، كليًا أو جزئيًا، دون إذن كتابي مسبق من صاحب الحقوق، باستثناء ما تسمح به القوانين المعمول بها. وتبقى حقوق الأعمال والمصادر المشار إليها لأصحابها.

دفع عم سعيد تمنه وهو بيتمتم بحسرة مضحكة: 200 كيلو موز، الله يسامحك يا سعيد.

ولأن الشارع اتقفل والعربيات بدأت تزمر، سعيد اضطر يستعين بالجيران والشباب اللي واقفين تحت البيت. وبدأت الملحمة! طالعين نازلين على السلم شايلين سباطات الموز وكأنهم بنوا الأهرامات من جديد.

سعيد بدأ يدخل الموز في أوضة الضيوف، الأوضة اتملت على أخرها وما بقاش فيها مكان لمطرح رجل، فبدأوا يكسروا الخطوط الدفاعية ويرصوا الموز في الصالة! سعيد كان واقف على باب الشقة بيدي كل واحد من الجيران كيلو طالع ونازل

ويقولهم بدموع: "يا جماعة اللي يحبني ياكل موز.. اللي يزعلني هحطله موز في جيبه!".

أول ما الناس نزلوا والعربيات مشيت، الهدوء حلّ فجأة. سعيد قفل باب الشقة، وقعد في نص الصالة وسط الغابة الاستوائية اللي عملها. قشر 4 موزات وأكلهم ورا بعض بسرعة وكأنه ينتقم منهم، وقام عشان يعمل شاي.. بس وقف في نص المطبخ، بص للموز وقال لنفسه: "شاي إيه بس.. ما نخليه عصير موز بقى بالمرة، ما هي كملت!".

في لحظة، الباب اتفتح ورجعت العيلة. اتسمرت رجلوهم على العتبة من هول المنظر. الصالة اختفت تماماً وبقت عبارة عن جبال أصفر في أصفر.

أول حد فاق من الصدمة كان ابنه، بص لابوه بذهول وقال: "إيه ده يا بابا؟! أنت فتحت شوادر فاكهة؟!"

سعيد بص لهم بمنتهى الهدوء والرزانة وهو ماسك كاس عصير الموز في إيده، وأخد منه بؤ وقال:

"اسمعوا كلكم.. من النهاردة، الفطار موز، والغدا موز مطبوخ، والعشا كيكة موز.. والحيوان اللي هيقولي 'أنا جعان' هخليه يقشر موز لما أيديه تنمل! وقوموا ادعوا معايا إن ربنا يبعت لنا فصيلة قرود تأجر الأوضة اللي جوة!"

وفعلاً، أُعلنت حالة الطوارئ الموزية!

بعد ساعتين، كانت العيلة كلها قاعدة قدام التلفزيون بملامح ممتعضة وشبعانة ، بيبصوا للموز اللي في إيديهم بعدم رضا وكأنهم مغصوبين على شرب دواء مر.

ابنه مسك بطنه وبص لأبوه بنبرة مأساوية: "بابا أرجوك.. أنا حسيت إن فصيلة دمي اتغيرت وبقت (موز موجب)!".

في اللحظة دي، بنته الصغيرة جت تتسحب على أطراف صوابعها لغرفتها، سعيد لف لها بسرعة وشاور بالموزة في إيده زي السيف: "على فين العزم يا دكتورة؟ اقعدي واعملي حسابك اللانش بوكس بكرة هيكون موز بوصفات مختلفة!"

البنت بصت له بذهول: "يعني إيه؟!"

سعيد أخد قطمة ببرود: "زي ما قولت! موز مخلل، وموز بالثوم، وساندوتش موز مقلي.. واليوم اللي بعده هيكون المفاجأة الكبيرة!"